Сурхондарё ва Қорақалпоғистонда 3,5 гектардан 50 гектаргача бўлган ерларни сотишга уринганлар қўлга олинди
Бандихонда 3,5 гектар ер учун 1,5 миллиард сўм талаб қилган, Тахиатошда эса 50 гектар ерни 50 минг долларга сотмоқчи бўлган шахслар устидан жиноят иши қўзғатилди.
Иқтисодий жиноятларга қарши курашиш йўналишида олиб борилган тезкор-қидирув тадбирлари натижасида жойларда қонунбузилиш ҳолатлари аниқланди.
Хусусан, Сурхондарё вилоятининг Бандихон туманида яшовчи, 1987 йилда туғилган шахс чорвачилик билан шуғулланмоқчи бўлган фуқаронинг ишончига кириб, туман ҳокимлиги захирасида бўлган 3,5 гектар ер майдонини юқори лавозимда ишловчи танишлари орқали унинг номига расмийлаштириб бериш эвазига 1 миллиард 500 миллион сўм талаб қилади.
Давлат хавфсизлик хизмати ва Бош прокуратура ҳузуридаги Департамент ходимлари ҳамкорлигида ўтказилган тезкор тадбирда, у сўралган пул маблағидан 110 минг АҚШ доллари ва 100 миллион сўм олган вақтида ашёвий далиллар билан ушланган.
Қорақалпоғистон Республикасида кузатилган ҳолатда эса, Қўнғирот туманида қишлоқ хўжалиги соҳасида фаолият юритувчи тадбиркор Амударё туманида яшовчи, 1983 йилда туғилган шахснинг ишончига кириб, аслида бошқа бир фуқаро учун қуёнчиликни ривожлантириш мақсадида Таҳиатош тумани ҳудудидан ажратилиб берилган 169 гектар ер майдонини гўё ўзига тегишли эканлигини айтади ва унинг 50 гектар қисмини ҳар гектарини 1 минг АҚШ долларидан, жами 50 минг АҚШ долларига сотишини маълум қилади.
Аммо, тадбиркор сўралган пул маблағини олган вақтида Давлат хавфсизлик хизмати ходимлари томонидан ашёвий далиллар билан ушланган.
Ҳозирда ҳар икки ҳолат юзасидан ушбу шахсларга нисбатан Жиноят кодексининг 168-моддаси 4-қисми “а” банди билан жиноят ишлари қўзғатилиб, тергов ҳаракатлари олиб борилмоқда.
