Ўзбекистонда Касбий таълим агентлиги ташкил этилди
Агентлик техникумлар фаолиятини ва касб-ҳунар таълими дастурларини бошқаради.
Ўзбекистон Республикаси Президенти томонидан имзоланган қарорга мувофиқ, Олий таълим, фан ва инновациялар вазирлиги ҳузурида Касбий таълим агентлиги ташкил этилди. Янги тузилма мамлакатда касб-ҳунар таълими тизимини такомиллаштириш, техникумлар фаолиятини мувофиқлаштириш ҳамда замонавий меҳнат бозори талабларига мос малакали мутахассислар тайёрлашни мақсад қилган.
Агентлик зиммасига касбий таълим дастурларининг мазмунини ишлаб чиқиш, малакалар даражалари ва ўқиш муддатларини белгилаш, битирувчилар билимларини баҳолаш мезонларини шакллантириш, шунингдек, ўқув-услубий таъминот бўйича ягона стандартларни жорий этиш вазифалари юклатилди.
Қарорга кўра, ҳудудларда тадбиркорлар кенгашлари ташкил этилиб, улар маҳаллий меҳнат бозорининг эҳтиёжларини инобатга олган ҳолда касбий ўқув жараёнини йўналтиради.
Шунингдек, Бандлик ва қашшоқликни қисқартириш вазирлиги ваучер тизимига кирмаган фуқароларни касб-ҳунарга ўқитишни амалга оширади.
2027 йил 1 январдан бошлаб эса иқтисодиёт тармоқларида ишга жойлашиш босқичма-босқич Миллий малака доираси талабларига боғланади. Бунда номзодлар тегишли диплом ёки малака сертификатига эга бўлиши лозим.
Бундан ташқари, касб-ҳунар таълими муассасаларига ўз хизматлари учун бозор нархларини мустақил белгилаш ва малакали мутахассисларни шартнома асосида бевосита жалб этиш ҳуқуқи берилади.
