Ташқи ишлар вазирлиги Россиядаги ўзбекистонликларни огоҳлантирди
Сўнгги пайтларда “Telegram”даги айрим каналларда ҳужжатларни “тез ва арзон” тайёрлаб беришни ваъда қилаётган жиноий гуруҳлар фаолияти кучайган.
Ўзбекистон Республикаси Ташқи ишлар вазирлиги Россия Федерациясида яшаётган ватандошларни интернетдаги сохта эълонлар ва қалбаки ҳужжатлар билан боғлиқ фирибгарликлардан огоҳлантирди.
Маълум қилинишича, сўнгги пайтларда ижтимоий тармоқларда, хусусан, “Telegram” иловасидаги айрим каналларда “ҳужжатларни тез ва арзон расмийлаштириш”ни таклиф қилувчи фирибгар гуруҳлар фаоллашган.
Вазирликнинг хабар беришича, Россияда жойлашган Ўзбекистон консуллик муассасаларига сохта ҳужжатлар тақдим этиш билан боғлиқ бир қатор ҳолатлар қайд этилган. Жумладан, Қозон шаҳридаги Бош консуллик томонидан Ўзбекистон фуқароси номига қалбаки “Ватанга қайтиш гувоҳномаси” олишга уриниш ва сохта никоҳ гувоҳномаси тақдим этилган ҳолатлар аниқланган ҳамда Россия қонунчилиги бўйича жиноят иши очилган. Шунингдек, бошқа бир фуқаро қалбаки никоҳ ҳужжати асосида бола учун туғилганлик ҳақидаги гувоҳнома олгани маълум бўлган.
Вазирлик барча Ўзбекистон фуқароларини расмий ҳужжатларни фақат ваколатли давлат органлари – элчихоналар, консулликлар ва ФҲДЁ бўлимлари орқали расмийлаштиришга чақирмоқда.
