Наманганда “заправка”да портлаш оқибатида бир киши вафот этди
10 тоннали цистернани кўчириш чоғида хавфсизлик қоидалари бузилган.
Наманган вилояти Чуст туманида жойлашган автомобилларга ёнилғи қуйиш шохобчасида содир бўлган портлаш оқибатида бир ишчи ҳалок бўлди.
Вилоят Фавқулодда вазиятлар бошқармаси маълумотларига кўра, воқеа 25 октябрь куни соат 18:47 да “Бирлик” маҳалласида жойлашган, фаолияти вақтинча тўхтатилган ёнилғи қуйиш шохобчасида қайд этилган.
Дастлабки маълумотларга кўра, 10 тоннали ёнилғи сақлаш цистернасини бошқа жойга кўчириш чоғида ёнғин хавфсизлиги талабларига риоя қилинмагани натижасида чақнаш юз берган. Ҳодиса оқибатида пайвандлаш ишларини бажараётган ходим воқеа жойида вафот этган.
Ҳодиса жойига Фавқулодда вазиятлар бошқармасининг учта ёнғин-қутқарув бўлинмаси жалб этилган. Ёнғин тарқалишининг олди ўз вақтида олинган.
Айни пайтда ҳодисанинг сабаблари, шунингдек моддий зарар миқдори ўрганилмоқда.
