Тошкентда иссиқ сув сифати бўйича тўловлар қайта кўриб чиқилади
Пойтахтда занг тусли сув ҳолатлари вақтинча техник сабаблар билан боғлиқ экани билдирилди.
Тошкент шаҳарининг айрим ҳудудларида аҳоли томонидан иссиқ сувнинг ранг ўзгариши — яъни зангга ўхшаш тусда чиқаяётгани ҳақида шикоятлар кузатилмоқда. Мазкур ҳолат юзасидан “Veolia Energy Tashkent” компанияси мутахассислари томонидан жойларга чиқиб, тизим ҳолатини ўрганиш ишлари бошланган.
Компания хабарига кўра, иситиш мавсуми олдидан иссиқлик тармоқларини синовдан ўтказиш жараёнида сувнинг вақтинча жигарранг тус олиши табиий жараён бўлиб, бу қувурларда сув айланиши тикланаётгани билан боғлиқ.
Текширув давомида айрим турар жойларда сув оқими қайтиш қувури орқали узатилгани аниқланган, бу эса ҳароратнинг пасайиши ва сув таркибидаги темир зарраларининг чиқишига сабаб бўлган.
“Veolia Energy Tashkent” мутасаддилари бошқарувчи ташкилотлар билан ҳамкорликда технологик сув тўкиш ва қувурларни тозалаш ишларини олиб бормоқда.
Шунингдек, компания сув сифати ташқи омиллар натижасида ёмонлашгани аниқланган ҳолларда истеъмолчиларга тўловлар қайта ҳисобланишини маълум қилди.
