Хива – National Geographic саҳифаларида

Дунёнинг энг машҳур нашрларидан бири — National Geographic журналида Хива шаҳрига бағишланган фотолавҳа эълон қилинди. “Бу Марказий Осиёнинг энг яхши сақланиб қолган ўрта асрлар манзилгоҳими? Хивани расмларда кўринг” (Is this Central Asia’s best-preserved medieval settlement? See Khiva in pictures) сарлавҳаси остида чоп этилган материалда муаллиф қадимий Хивани Марказий Осиёдаги энг яхши сақланиб қолган тарихий шаҳар сифатида таърифлайди.

 

Мақолада Хиванинг ўзига хос архитектураси, қадимий деворлари, минорлари ва тор кўчалари билан ўтмиш руҳини сақлаб қолган ноёб манзилгоҳ экани қайд этилган. Журнал саҳифаларида тонгги қуёш нурлари остида ёритилган эски шаҳар манзаралари, маҳаллий ҳунармандларнинг ёғоч ўймакорлиги ва кулолчилик санъатидаги ишлари, шунингдек, шаҳарнинг кундалик ҳаёти — тандирда нон ёпауётган аёллар, чойхоналар ва осойишта кўчалар тасвирланган.

 

Муаллиф таъкидлашича, Хива бугун ҳам ўз анъаналарини сақлаб қолган, самимий ва меҳмондўст шаҳар сифатида дунё сайёҳларини ўзига ром этмоқда. Ушбу материал орқали National Geographic ўқувчилари Ўзбекистоннинг маданий мероси ва тарихий гўзаллигини янги нигоҳда кашф этиш имкониятига эга бўлдилар.