АҚШ делегацияси Ўзбекистондаги Ислом цивилизацияси марказига ташриф буюрди
Меҳмонлар қадимий қўлёзмалар ва ноёб артефактларни кўриб, Ўзбекистоннинг маданий меросини юқори баҳолади.
АҚШнинг Жанубий ва Марказий Осиё бўйича махсус вакили Сержио Гор ва АҚШ Давлат котибининг биринчи ўринбосари Кристофер Ландау бошчилигидаги делегация Ўзбекистондаги Ислом цивилизацияси марказига ташриф буюрди.
Ташриф давомида меҳмонлар марказ фаолияти, унинг миллий архитектураси ва бунёдкорлик ечимлари билан яқиндан танишдилар. Улар Ислом цивилизацияси музейи экспозициясини кўздан кечиришди, унда қадимий қўлёзмалар, ноёб артефактлар ва тарихий осори-атиқалар тақдим этилган. Меҳмонлар Ўзбекистоннинг маданий меросни асраб-авайлаш ва уни жаҳон миқёсида тарғиб қилиш борасидаги саъй-ҳаракатларини юқори баҳоладилар.
Марказ экспозицияси “Цивилизациялар, Шахслар ва Кашфиётлар” концепцияси асосида ташкил этилган бўлиб, Ўзбекистон ҳудудида етишиб чиққан буюк олимлар ва уларнинг илмий мероси ҳамда жаҳон тараққиётига қўшган ҳиссаси кенг ёритилган.
АҚШ делегациясининг ташрифи икки мамлакат ўртасидаги маданий-гуманитар алоқаларни мустаҳкамлаш ва Ўзбекистоннинг бой тарихий ҳамда илмий меросини халқаро миқёсда тарғиб этишда муҳим қадам бўлди.
