Фарғонада болалардан дадасидан қандай ҳид келишини сўраган тарбиячи жазоланди

 

Аввалроқ ижтимоий тармоқларда тарбиячининг болалардан дадасидан қандай ҳид келишини сўрагани акс этган видео тарқалганди. Ҳолат юзасидан Фарғона вилояти Мактабгача ва мактаб таълими бошқармаси расмий муносабат билдирди.

 

Қайд этилишича, мазкур ҳолат Фурқат туманидаги 1-сонли давлат мактабгача таълим ташкилоти тайёрлов гуруҳи тарбиячиси С.O. томонидан ўқув дастурларида белгилаб қўйилмаган тартибда оғзаки сўровнома ўтказилганлиги билан боғлиқ. Ушбу сўровнома видеоси тайёрлов гуруҳининг ота-оналар учун мўлжалланган Телеграм гуруҳига жойлаштирилган.

 

Ўрганиш жараёнида тарбиячи С.O. билан суҳбат ўтказилиб, у мазкур сўровномани мустақил равишда, оқибатларини ўйлаб кўрмасдан ўтказганини ва видеолавҳани ота-оналар гуруҳига жойлаштирганини афсус билан маълум қилган.

 

Шунингдек, ўрганиш давомида тарбиячи С.O.нинг иш фаолияти ҳамда Мактабгача ва мактаб таълими вазирлигининг 2025 йил 29 августдаги 323-сонли “Мактабгача таълим ташкилоти ва педагогларининг иш ҳужжатларини тасдиқлаш тўғрисида”ги буйруғи асосида юритилиши лозим бўлган иш ҳужжатлари тўлиқ текширилган.

 

Натижада иш ҳужжатларида айрим камчиликлар аниқланиб, ўқув жараёнларига мос келмаган сўровномалар ўтказилганлиги юзасидан тарбиячидан тушунтириш хати олинган.

 

Тарбиячи С.O.гa қонунларда белгиланган тартибда хайфсан интизомий жазо чорасини қўллаш тўғрисида қарор қабул қилинган.