Ўзбекистон иқтисодиёти 7,6 фоизга ўсди, олтин-валюта захиралари 55 миллиард долларга етди
Шавкат Мирзиёев раислигида 2026 йил учун макроиқтисодий режа ва бюджет кўрсаткичлари муҳокама қилинди.
27 октябрь куни давлат раҳбари Шавкат Мирзиёев ҳузурида ўтган кенгайтирилган йиғилишда жорий йилда иқтисодиётда эришилган натижалар, шунингдек, келгуси — 2026 йил учун режалаштирилган асосий макроиқтисодий кўрсаткичлар ва бюджет параметрлари атрофлича кўриб чиқилди.
Маълум қилинишича, 2025 йилнинг дастлабки тўққиз ойида иқтисодиёт 7,6 фоизга ўсган. Саноат ҳажми 6,8 фоиз, қурилиш — 14,2 фоиз, хизматлар соҳаси — 14 фоиз, қишлоқ хўжалиги эса 4,1 фоизга ошган. Олтин-валюта захиралари 55 миллиард долларга етиб, ўтган йилга нисбатан 35 фоизга кўпайган.
Халқаро рейтинг агентликлари мамлакат иқтисодий барқарорлигини юқори баҳолади: “Fitch Ratings” Ўзбекистон суверен рейтингида ошиш қайд этди, “Moody’s” ва “S&P Global” эса прогнозни “барқарор”дан “ижобий”га ўзгартирди.
Давлат раҳбари эришилган натижалар аҳолининг турмуш даражасига ижобий таъсир кўрсатаётганини таъкидлади. Аҳоли даромадлари 18,4 фоизга, омонатлар 35,3 фоизга, ўртача иш ҳақи эса 19,2 фоизга ошган.
Президент йил якунигача юқори ўсиш суръатларини сақлаб қолиш зарурлигини қайд этиб, ялпи ички маҳсулот ҳажмини 135 миллиард доллардан ошириш иқтисодий комплекснинг асосий вазифаси этиб белгиланди.
Келгуси йил учун асосий мақсадлар сифатида ўсишни 6,6 фоиз даражасида таъминлаш, ЯИМни 150 миллиард доллардан ошириш, иқтисодиётга камида 400 трлн сўм йўналтириш ва инфляцияни 7 фоиздан оширмаслик белгиланди.
Йиғилишда давлат раҳбари харажатларни қисқартириш, самарадорликни ошириш ва бюджет маблағларининг мақсадли сарфланишини таъминлашни барча даражадаги раҳбарлар учун устувор вазифа сифатида белгилаб берди.
Хусусан, стратегик тармоқларда таннархни камайтириш, хусусий сектор улушини кенгайтириш, самарасиз имтиёз ва субсидияларни қайта кўриб чиқиш, яширин иқтисодиёт улушини қисқартириш каби аниқ йўналишларда топшириқлар берилди.
Шунингдек, бюджетдан ташқари жамғармалардаги маблағларнинг бир қисмини мактаблар қурилиши ва тиббиёт соҳасига йўналтириш топширилди.
Йиғилиш якунида 2026 йилги Давлат бюджети лойиҳасининг асосий йўналишлари тасдиқланди.
