Шавкат Мирзиёевнинг жорий иш ҳафтаси муҳим воқеаларга бой бўлади

 

Бугун давлат раҳбари жорий йилда иқтисодиётда кутилayotgan натижалар ҳамда 2026 йилга мўлжалланган асосий макроиқтисодий кўрсаткичлар юзасидан кенгайтирилган йиғилиш ўтказади. Унда мамлакат иқтисодий ривожланишининг устувор йўналишлари, таркибий ислоҳотларни жадаллаштириш ва барқарор ўсиш суръатларини таъминлаш масалалари муҳокама қилинади.

 

Куннинг иккинчи ярмида Президентимиз АҚШ Президентининг Жанубий ва Марказий Осиё бўйича махсус вакили Сержио Гор бошчилигидаги делегацияни қабул қилади. Учрашувда Ўзбекистон ва АҚШ ўртасидаги стратегик шерикликни янада мустаҳкамлаш, минтақавий хавфсизлик, савдо-инвестиция ҳамкорлиги ва экология соҳасидаги истиқболли лойиҳалар кўриб чиқилади.

 

Шунингдек, шу ҳафта Президентимиз Самарқанд шаҳрида ўтаётган ЮНЕСКО Бош конференциясининг 43-сессияси очилиш маросимида иштирок этади. Мазкур тадбир илк бор Париж шаҳридан ташқарида ўтказилаётгани билан тарихий аҳамият касб этади. Давлат раҳбари анжуманда маданият, илм-фан ва таълим соҳаларида халқаро ҳамкорликни кучайтириш борасидаги ташаббусларни илгари суради ҳамда қатор икки томонлама учрашувлар ўтказади.

 

Бундан ташқари, жорий ҳафтада мамлакатимизга Сербия Республикаси Президенти Александр Вучич ва Финляндия Республикаси Президенти Александр Стубб расмий ташриф билан келади. Саммитлар доирасида олий даражадаги музокаралар ўтказилиб, сиёсий мулоқотни чуқурлаштириш, савдо-иқтисодий ва инвестициявий алоқаларни кенгайтириш, маданий-гуманитар соҳаларда ҳамкорликни ривожлантириш масалалари муҳокама қилинади.