Германияда “CPHI Frankfurt 2025” кўргазмаси бошланди
Унда Ўзбекистон бу йил илк бор миллий стенд форматда иштирок этмоқда.
Германиянинг Франкфурт шаҳрида жаҳон фармацевтика саноатининг энг йирик ва нуфузли халқаро майдонларидан бири — “CPhI Worldwide – CPhI Frankfurt 2025” кўргазмаси ўз ишини бошлади.
Ўзбекистон бу йил илк бор Фармацевтика тармоғини ривожлантириш агентлиги ташаббуси билан миллий стенд форматда иштирок этмоқда. Миллий павильонда мамлакатнинг етакчи бешта фармацевтика компанияси ўзининг инновацион маҳсулотлари, янги илмий ишланмалари ва технологиялик ечимларини халқаро ҳамжамият эътиборига ҳавола этмоқда.
ТошВЗИТИ (Тошкент Вакцина ва Зардоблар илмий-тадқиқот институти) вакиллари ҳам миллий делегация таркибида иштирок этиб, институтнинг илмий салоҳияти, биотехнологик ишланмалари ва халқаро ҳамкорликдаги тажрибасини тақдим этмоқда. Ушбу иштирок — маҳаллий илмий ишланмаларнинг жаҳон фармацевтика ҳамжамиятига интеграциялашуви йўлида муҳим босқич бўлиб хизмат қилмоқда.
“CPhI Frankfurt 2025” — глобал фармацевтика индустриясининг марказий платформаларидан бири. Ўзбекистоннинг иштироки эса миллий фармацевтика тармоғининг халқаро бозорларга чиқиши, экспорт салоҳиятининг ортиши ҳамда илмий-технологик ҳамкорликнинг янада кенгайишига хизмат қилмоқда.
