Жанубий Кореяда террорчилик фаолиятини молиялаштирган Ўзбекистон фуқароси қўлга олинди

Жанубий Корея ҳуқуқни муҳофаза қилиш органлари томонидан 29 ёшли Ўзбекистон фуқароси террорчилик фаолиятини молиялаштиришда айбланиб ҳибсга олинди. У хайрия ташкилоти ниқоби остида экстремистик гуруҳларга маблағ йўналтирганликда гумон қилинмоқда.

 

Тергов материалларига кўра, гумонланувчи African Well номли сохта хайрия лойиҳаси орқали криптовалюта (Tether – USDT) кўринишида маблағ йиғиб, уларни “Катиба Тавҳид вал Жиҳод” ва “Ҳамас” террорчилик ташкилотларига ўтказган. Йиғилган маблағ миқдори 952 миллион вонни (тахминан 665 минг АҚШ доллари) ташкил этган — бу мамлакатда шу турдаги энг катта ҳолат сифатида қайд этилган.

 

Ўзбекистонлик шахс илгари ҳам терроризмни молиялаштиришда гумон қилинган ва Ўзбекистон ҳуқуқни муҳофаза қилиш идоралари томонидан қидирувга берилган эди. Элчихона унинг паспортини бекор қилганидан сўнг, Жанубий Корея полицияси махсус операция давомида гумонланувчини қўлга олган.

 

Текширув натижасида гумонланувчининг саккизта телефон ва бир нечта электрон қурилмалари мусодара қилинди. Шунингдек, у бир нечта ижтимоий тармоқларда экстремистик ғояларни тарғиб қилгани, диний ниқоб остида террорчиликка даъват этувчи хабарларни тарқатгани аниқланган.

 

Ҳозирда тергов органлари гумонланувчининг Жанубий Кореядаги эҳтимолий шерикларини ва маблағларнинг якуний манзилларини аниқлаш устидан иш олиб бормоқда.