“Салом, Ўзбекистон!”: Самарқандда ЮНЕСКО Ёшлар форуми бўлиб ўтмоқда

Кеча, 27 октябрь куни Самарқанд шаҳрида “Иқлим ҳаракати ва унинг ижтимоий таъсири, айниқса ёшлар учун” мавзусида 14-ЮНЕСКО Ёшлар Форуми бошланди. Бу ҳақида тадбирда иштирок этаётган “Zamon.uz” мухбири хабар бермоқда.

 

Маълумотларга кўра, тадбирда иштирок этиш учун дунёнинг 100 дан ортиқ давлатидан келган 150 нафар ёш етакчи, эксперт ва халқаро ташкилотлар вакиллари ўзаро фикр алмашиши кўзда тутилган.

 

Форумнинг очилиш маросимида ЮНЕСКО Бош директорининг ижтимоий ва гуманитар фанлар бўйича ёрдамчиси Лидия Брито, Ўзбекистон Республикаси Президенти Администрацияси Креатив иқтисодиёт ва туризм департаменти мудири ўринбосари Элмурод Нажимов, Ўзбекистон Ёшлар ишлари агентлиги бош директори Алишер Саъдуллаев ва бошқалар сўзга чиқиб, иқлим ўзгариши, экологик муаммолар бугун глобал масалага айланиб, дунёдаги барча мамлакатлар ҳукуматини ўйлантираётгани, экологик инқироз кўплаб ҳалокатларга сабаб бўлаётганини таъкидлади.

 

“Ўзбекистон Республикаси ЮНЕСКОнинг таълим, фан ва маданият соҳалари билан бир қаторда экологик масалалар бўйича чақириқ ва даъватларни ҳам қўллаб-қувватлаб, бу борада қатъий позисиясини намоён этиб келмоқда. Буни 2025 йилнинг юртимизда “Атроф-муҳитни асраш ва “яшил иқтисодиёт йили” деб номлангани мисолида ҳам кўриш мумкин. Йил номидан келиб чиқиб тасдиқланган давлат дастури асосида юртимизда кенг кўламли ишлар амалга оширилди. Жорий йил бошида Президентимиз ташаббуси билан Ўзбекистон маданият ва санъатни ривожлантириш жамғармаси томонидан илк бор Орол маданияти саммити ўтказилди, дунёнинг турли давлатларидан ёшларни бирлаштирган “Орол мактаби” таълим дастури ишга туширилди. Бу каби тадбирлар орқали биз барқарор ривожланишга тўсиқ бўладиган экологик муаммоларнинг олдини олиш ва уларнинг таъсирини юмшатишга эришаяпмиз”, деди Президенти Администрацияси Креатив иқтисодиёт ва туризм департаменти мудири ўринбосари Элмурод Нажимов.

 

“Generation of Acion” (акцияни бошлаш) шиори остида ўтказилган очилиш маросимида турли давлатлар вакиллари иқлим ўзгаришларининг олдини олиш ва экологик муаммоларнинг ечимлари бўйича ташаббус ва ғояларини илгари сурдилар, инновацион ечимлар таклиф этилди.

 

 

Форумда муҳокама қилинадиган масалалар ва ташаббуслар ЮНЕСКО Бош конференцияси 43-сессияси тадбирларида эътиборга олинади.

 

Бугун, 28 октябрь куни форумнинг иккинчи кун тадбирлари бўлиб ўтмоқда. Унда иштирокчилар форум давомида ишлаб чиқилган иқлим бўйича тавсияларни қабул қилади.