Туркияда аэропортда 5 нафар ўзбекистонлик 61 килограмм олтин билан қўлга олинди
Олтин гўшт майдалагичлар ва миксерлар ичига эҳтиёт қисмлар сифатида яширилган.
Туркия ҳуқуқни муҳофаза қилиш органлари 5 нафар Ўзбекистон фуқаросини ноқонуний равишда олтин олиб ўтишга уриниб кўргани учун қўлга олди. Бу ҳақда маҳаллий ОАВлар хабар берди.
Маълум қилинишича, 3 нафар аёл ва 2 нафар эркакдан иборат гуруҳ Ўзбекистондан Истанбул орқали Каппадокия вилоятининг Невшехир аэропортига учиб келган. Текширув давомида уларнинг бағажларидан 61 килограмм 121 грамм олтин аниқланган. Қимматбаҳо металл гўшт майдалагичлар ва миксерлар ичига эҳтиёт қисмлар шаклида эритилиб жойлаштирилгани маълум бўлган.
Терговга кўра, Невшехир вилояти полициясининг контрабанда ва уюшган жиноятчиликка қарши кураш бўлими ходимлари гумондорлар ҳақида аввалдан маълумотга эга бўлган. Аэропортда уларни кутиб олиш учун келган шахс ҳам қўлга олинган.
Қўлга олинган шахслар ва топилган олтинлар мусодара қилиниб, гумондорлар суд органларига топширилган.
