Қорақалпоғистонда МИБ орқали 10 та тадбиркорнинг қарзи ундирилди
Ижро ҳаракатлари давомида 1,3 млрд сўмдан ортиқ қарздорлик ундирилган.
Нукус, Тошкент, Урганч ва Чимбой туманлараро иқтисодий судларининг қарорларига асосан қарздор “QORATOV YO‘LLARDAN MUNTAZAM FOYDALANISH” давлат муассасасидан ундирувчи 10 та тадбиркорлик субъектлари фойдасига жами 1 млрд 341 млн сўм қарз ундириш белгиланган.
Ундирувчилар ушбу қарорларга асосан чиқарилган ижро ҳужжатларни ижро этиб беришни сўраб, Мажбурий ижро бюроси Қораўзак туман бўлимига мурожаат қилган ва бўлим ходимлари томонидан ижро ҳаракатларига киришилган.
Жумладан, суд қарори ижросини таъминлаш мақсадида бўлим давлат ходимлари томонидан қарздорнинг асосий банк ҳисоб рақамига электрон инкассо қўйилган ва қарздорга тегишли 2 та автомашиналар хатловга олинган.
Шунинг натижасида, жорий йилнинг 28 октябрь куни 1,3 млрд. сўмдан ортиқ қарздорлик тўлиғи билан ундирилиб, ушбу пул маблағлари ундирувчиларнинг ҳисоб рақамига ўтказиб берилган.
