Ўзбекистонда 7 кун электр учун тўлов қилиб бўлмаслиги ҳақидаги хабарлар рад этилди
“Ҳудудий электр тармоқлари” ижтимоий тармоқларда тарқалган хабарлар мутлақо асоссиз ва ҳақиқатга тўғри келмаслигини маълум қилди.
"Ижтимоий тармокларда тарқалган" 30 октабрдан 5 ноябргача электр энергияси учун тўлов қилиб бўлмайди" деган хабар мутлақо асоссиз ва ҳақиқатга тўғри келмайди", – дейди "Ҳудудий электр тармоқлари" АЖ матбуот хизмати.
Компания маълумотларига кўра, айни пайтда ҳеч қандай янги ҳисоб-китоб тизимига ўтиш ишлари амалга оширилмаяпти ва электр энергияси учун тўловларни амалга оширишда техник муаммолар мавжуд эмас.
"Ҳудудий электр тармоқлари" АЖ фуқаролардан фақат расмий манбаларда эълон қилинадиган ахборотларга ишониш ва тасдиқланмаган хабарларни тарқатмасликни сўради. Компания ўз мижозларига электр энергияси билан узлуксиз таъминлашни давом эттиришни ва тўлов тизимида ҳеч қандай ўзгаришлар бўлмаслигини таъкидлади.
