“43-сессия минтақа тарихидаги энг йирик халқаро форумлардан бири бўлади”
Ўзбекистон Президенти матбуот котиби Шерзод Асадов ЮНEСКО Бош конференцияси 43-сессияси арафасида оммавий ахборот воситалари вакиллари учун брифинг ўтказди.
Бугун Самарқанд шаҳрида ЮНEСКО Бош конференциясининг 43-сессияси ўз ишини бошлайди. Тарихий аҳамиятга эга бўлган бу форум сўнгги 40 йил ичида илк бор ЮНEСКОнинг Париждаги бош қароргоҳидан ташқарида ва биринчи марта Марказий Осиёда ўтказилмоқда. Форум ЮНEСКО ташкил этилганининг 80 йиллиги билан ҳам мос келмоқда.
43-сессия минтақа тарихидаги энг йирик халқаро форумлардан бирига айланиши кутилмоқда. Унда 190 та аъзо давлат ва халқаро ташкилотлардан 2 минг 800 дан ортиқ вакил, шу жумладан 70 га яқин юқори даражали шахслар иштирок этади. Тантанали очилиш маросимида фахрий меҳмонлар сифатида ҳозир мамлакатимизда бўлиб турган Сербия Республикаси Президенти Александр Вучич ва Словакия Республикаси Президенти Петер Пеллегрини ҳам қатнашади.
Самарқанд сессияси доирасида 150 дан ортиқ турли тадбирлар ўтказилади, шу жумладан Ўзбекистон ташаббуси билан 20 дан зиёд қўшимча тадбирлар ташкил этилган. Тантанали очилиш маросимида Президентимиз Шавкат Мирзиёев иштирок этиб, нутқ сўзлайди. Давлатимиз раҳбарининг нутқида бир қатор муҳим ташаббуслар илгари сурилиши кутилмоқда.
Тадбир доирасида Президентимиз Словакия Президенти Петер Пеллегрини ва ЮНEСКО Бош директори Одри Азуле билан икки томонлама учрашувлар ўтказади. ЮНEСКО Бош конференциясининг 43-сессияси дунё ва мамлакатимизнинг етакчи оммавий ахборот воситалари, жами 500 дан зиёд журналист томонидан ёритилади. Самарқандда уларнинг самарали фаолияти учун барча шароитлар яратилган.
