Шавкат Мирзиёев ЮНEСКО Бош конференциясининг очилиш маросимида иштирок этиш учун Самарқандга келди
Давлат раҳбарининг ташрифи эзгу анъанага мувофиқ Имом Бухорий мақбарасига зиёрат билан бошланди.
Президент Шавкат Мирзиёев 30 октябрь куни ЮНEСКО Бош конференциясининг 43-сессияси очилиш маросимида иштирок этиш мақсадида Самарқандга ташриф буюрди. Давлат раҳбарининг ташрифи эзгу анъанага мувофиқ Имом Бухорий мақбарасига зиёрат билан бошланди. Мажмуада Қуръон тиловати қилинган, дуо ўқилган ва сўнгги пардозлаш ишлари билан танишилди.
Давлат раҳбарининг ташаббуси билан қайта бунёд этилган Имом Бухорий мажмуаси 44 гектар майдонга эга бўлиб, унинг таркибига мўътабар мақбара, 10 минг кишилик масжид, маъмурият биноси, музей ва 75 метрлик миноралар киради. Мажмуа нафақат зиёратгоҳ, балки илм-маърифат, тарбия ва ибрат маскани сифатида ҳам хизмат қилади.
Янги ташкил этилган инновацион музейда Имом Бухорийнинг ҳаёти ва илмий мероси, шунингдек, Қуръонда зикр қилинган пайғамбарлар тарихи, ҳадисларнинг жамланиши ҳақидаги маълумотлар намойиш этилади. Мажмуа атрофида меҳмонхоналар ва хизмат кўрсатиш бинолари қурилиши якунланган бўлиб, бу ерда зиёратчилар учун барча қулайликлар яратилган.
