Тошкент вилоятида қадимий ибодатхона топилди
У V-VII асрларга тегишли экани айтилмоқда.
Тошкент вилоятидаги Қанқа ёдгорлигида олиб борилаётган экспедиция давомида V-VII асрларга тегишли ибодатхона ва ҳарбий анжомлар топилди. Бу ҳақида Ўзбекистон Фанлар академияси хабар берди.
Қайд этилишича, Фанлар академияси Тарих институти Тошкент вилояти ҳокимлиги билан ҳамкорликда Қанқа ёдгорлигини “Очиқ осмон остидаги музей”га тайёрлаш бўйича изланишларни олиб бормоқда.
Институтнинг “Ҳарбий тарих маркази” ва “Қадимги дунё тарихи” бўлимлари ходимларидан иборат гуруҳ томонидан олиб борилаётган бу йилги изланишлар давомида ёдгорлик арки қуйи майдончасида жойлашган V-VII асрларга тегишли ибодатхонани ўрганиш жараёнида металлдан ишланган совут бўлаклари топилган.
“Қадимда жамият маданий ҳаётида муҳим ўрин тутувчи ибодатхонага ҳар бир кишининг ўзи тайёрлаган энг яхши маҳсулоти, буюмини совға қилиш анъанаси бўлган. Жангчи совути ҳам қуролчи уста томонидан худди шу мақсадда ибодатхонага топширилган бўлиши мумкин. Кекса Туронда бу каби анъаналар кўп учрайди. Мисол ўлароқ, Бойкенд ибодатхонаси қазув ишлари давомида топилган ҳарбий анжомларни кўрсатиб ўтишимиз мумкин.
Қанқа ибодатхонасида бу каби ҳарбий анжомларнинг сақланиши айниқса муҳим ўрин тутади. Зеро Қанқа ибодатхонаси тарихи туркий халқларнинг ҳарбийликка йўғрилган турмуши билан чамбарчас боғланган. 2021 йили бошланган қазув ишлари давомида ибодатхонага кириш қисмида от анжомлари топилган бўлса, бу йил топилган совут туркий халқларнинг ҳарбий соҳага кучли эътибор берганларини яна бир бор тасдиқлайди”, дейилади хабарда.
