Энди хусусий секторда ишлайдиган аёлларга ҳам "декрет" пули тўлаб берилади
Ўзбекистонда хусусий секторда ҳар йили камида 150-160 минг аёл туғруқ таътилига чиқади.
Сенатнинг ўн биринчи ялпи мажлисида “Давлат ижтимоий суғуртаси тўғрисида”ги қонун лойиҳаси муҳокама қилинди.
Сенатнинг Фан таълим ва соғлиқни сақлаш масалалари бўйича қўмита раиси ўринбосари Орал Атаниязованинг айтишича, 2024 йилда 133 мингга яқин аёлларнинг туғруқ нафақалари тўлаб берилган. Шундан 15 мингдан кўпроғи хусусий секторда ишловчи аёллар ҳиссасига тўғри келмоқда.
Маълум бўлишича, хусусий секторда ҳар йили камида 150-160 минг аёл туғруқ таътилига чиқади.
Янги қонун лойиҳасига кўра, Давлат ижтимоий суғурта жамғармаси томонидан уч турдаги, яъни касаллик муносабати билан вақтинча меҳнатга лаёқатсизлик, ҳомиладорлик ва туғиш, ишни ёки даромадни йўқотиш бўйича суғурта тўловлари тўланиши белгиланмоқда.
Бундай суғурта ҳодисалари юзага келган тақдирда, жамғарма томонидан суғурталанган шахсларга ёки уларнинг оила аъзоларига давлат ижтимоий суғуртаси бўйича вақтинча меҳнатга лаёқатсизлик нафақаси, ҳомиладорлик ва туғиш нафақаси, ишдан бўшатиш нафақаси тўлаб берилиши назарда тутилмоқда.
