Ўзбекистонда табиий газ истеъмоли меъёри 5 баравар оширилди
Шунингдек, эҳтиёжманд оилалар учун компенсациялар йил давомида берилади.
2025-2026 йилги иситиш мавсумида аҳоли учун табиий газ истеъмоли бўйича базавий меъёр 5 баробарга оширилди. Вазирлар Маҳкамасининг 204-сон қарорига асосан, ноябрдан февралгача ҳар бир ой учун 500 куб метргача, мартдан октябргача эса 100 куб метргача базавий меъёр белгиланди.
Куз-қиш мавсумида табиий газ истеъмоли юқори бўлганлиги сабаби Қорақалпоғистон Республикаси ва Хоразм вилоятида октябрдан февралгача бир ойлик базавий меъёр 500 куб метр қилиб белгиланди.
Бундан ташқари, Президент қарорларига асосан, эҳтиёжманд оилаларга ишлатилган электр энергияси ва табиий газ учун давлат томонидан ҳар ойда компенсация берилади. Компенсация микдори:
- Электр энергияси учун — ойда базавий меъёрдан ортиқ (200 кВт·соатдан кейинги) 150 кВт·соатгача;
- Табиий газ учун — қиш ойларида 250 куб метргача, бошқа ойларда 150 куб метргача базавий меъёрдан ортиқ фойдаланилган қисми учун.
Илгари компенсациялар фақат қиш ойларида амал қилган бўлса, энди йил давомида ҳар ойда берилади.
Шунингдек, 2025 йил ноябрь ойида ҳар бир эҳтиёжманд оилага 1 миллион сўм микдорида бир марталик моддий ёрдам ажратилади.
