Аҳолига яқин жойлашган “заправка”лар хавфсиз ҳудудга кўчирилади

Лойиҳага кўра, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Қурилиш ва уй-жой коммунал хўжалиги вазирлиги мутасадди ташкилотлар билан биргаликда 2026 йил 1 мартга қадар шохобчаларда ўтказилган хатлов натижаларидан келиб чиқиб, уларнинг фаолиятини белгиланган минимал талабларга мувофиқлаштирилади.

 

2026 йил 1 апрелга қадар фуқаролар ҳаёти ва соғлиғига хавф туғдирадиган, жамоат хавфсизлиги ва атроф-муҳитни муҳофаза қилиш, саноат ва ёнғин хавфсизлиги ҳамда шаҳарсозлик нормалари ва қоидаларига, жумладан муҳофаза зоналари талабларига жавоб бермайдиган шохобчаларни хавфсиз ҳудудларга кўчириш чоралари кўрилади.

 

Бунда шохобчаларни кўчириш ёки бузиш билан боғлиқ харажатлар қонунчиликда белгиланган тартибда компенсация қилинади.

 

Кўчириладиган шохобчалар учун ер майдонлари инфратузилмаларга эга бўлган ҳудудлардан ажратиб берилади.

 

Шохобчалар ўз фаолият турини ўзгартириш истагини билдирган тақдирда уларга шохобча жойлашган ҳудудда қонунчиликда белгиланган тартибда бошқа фаолият тури билан шуғулланишга рухсат берилади.

 

Автомобилларга газ тўлдириш компрессор шохобчалари хавфсиз ҳудудларга кўчирилган тақдирда қонунчиликда белгиланган тартибда уларга истисно тариқасида мавжуд инфратузилмаларга (газ тармоқлари, электр энергияси ва бошқалар) уланишга техник шартлар берилади.

 

Шохобчалар жойлашган ҳудудлар ҳимоя майдонлари атрофида шаҳарсозлик нормалари ва қоидаларига мувофиқ бўлмаган бошқа объектлар қурилиши учун ер майдонлари ажратилиши қатъиян тақиқланади.