Андижонда фуқаро ижтимоий ходимни чойнак билан уриб жароҳатлади
Ҳозирда ҳолат юзасидан суд-тиббиёт экспертизаси тайинланган.
Андижон шаҳридаги маҳалла фуқаролар йиғини маъмурий биносида ижтимоий ходимга нисбатан жисмоний зўравонлик содир этилди. Бу ҳақида Ижтимоий ҳимоя миллий агентлиги хабар бермоқда.
Қайд этилишича, ҳодиса бугун, 1 ноябрь куни юз берган. Унда 1988 йилда туғилган, олий маълумотли, 4 нафар фарзанд онаси, 2024 йил июндан буён «Инсон» марказида комплекс ижтимоий хизматлар кўрсатувчи ижтимоий ходим сифатида фаолият юритаётган М.Д. жабрланган.
Можаро содир бўлишига маҳалла фуқаролари — 1985 йилда туғилган Й.Г. ҳамда 1991 йилда туғилган Й.Д. нинг электр энергия учун бериладиган бир марталик 1 млн сўмлик компенсация пули банк томонидан қарз эвазига ушлаб қолингани сабаб бўлган.
Жанжал вақтда ушбу фуқаролардан бири қўлдаги сопол чойнак билан ижтимоий ходимга зарба бериб, юзи ва қўлига тан жароҳати етказган.
Ижтимоий ходим Д.М. томонидан 102 рақамига мурожаат қилинган ва ҳозирда ҳолат бўйича терговга қадар текширув ишлари олиб борилмоқда. Суд-тиббиёт экспертизаси тайинланиб, етказилган жароҳат оғирлик даражаси аниқланмоқда.
