Ўзбекистон ва Финляндия ҳамкорлигида “Green Zone” барпо этилади
У чиқиндиларни қайта ишлаш учун махсус ташкил этилмоқда.
Тошкент шаҳрида 31 октябрь куни Финляндия Президенти Александр Стубнинг Ўзбекистонга расмий ташрифи доирасида “Ўзбекистон – Финляндия” бизнес форуми бўлиб ўтди.
Ўзбекистон Республикаси Президенти Шавкат Мирзиёев ва Финляндия Республикаси Президенти Александр Стубб ўртасида бўлиб ўтган музокаралар якунида турли йўналишларда Қўшма баёнот имзоланди.
Шу жумладан, Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Финляндиянинг “EPSE Oy” компанияси ўртасида ҳамкорлик меморандуми имзоланди.
Англашув меморандумида “Ўзбекистон Республикасида чиқиндиларни қайта ишлаш бўйича “Греэн Зоне” саноат марказини барпо этиш соҳасида ҳамкорлик қилиш тўғрисида”ги қатор чора-тадбирлар назарда тутилган.
Унга кўра, республикада чиқиндиларни утилизация қилиш ва уларнинг қийматини ошириш технологияларини ишлаб чиқиш ҳамда жорий этиш соҳаси ривожлантирилади.
Чиқиндиларни иқтисодиётнинг муҳим бўлагига айлантиришга қаратилган саноат объектлари ва инновацион майдончалар яратилади.
Томонлар иштирокидаги илғор технологиялар, билим ва компетенцияларга асосланган ўзаро манфаатли ҳамкорлик шаклларини ўрганиш ҳамда амалга ошириш масалаларига алоҳида аҳамият қаратилади.
