Тошкентда 24 квадрат метрлик уйга 35 киши рўйхатга қўйилди
Ҳолатга кўра, рўйхатдаги ҳар бир кишига ўртача 0,7 квадрат метр майдон тўғри келган — бу стол майдонидан ҳам кичик.
Тошкент шаҳрида уй-жой ижараси билан боғлиқ ғайриоддий ҳолат аниқланди. Давлат солиқ қўмитаси “E-ижара” электрон тизими орқали ўтказилган мониторинг натижасида тахминан 24 квадрат метр майдонга эга бўлган хонадонга жами 35 нафар фуқаро рўйхатга қўйилгани маълум бўлди.
Таҳлил жараёнида квартира эгаси икки нафар талаба билан расмий ижара шартномаси тузиб, уларга атиги 0,5 квадрат метр майдондан ижарага бергани ва ҳар биридан ойига 1,5 миллион сўмдан тўлов ундирилгани қайд этилди. Шунингдек, ушбу манзилда қўшимча яна 33 киши рўйхатдан ўтказилгани аниқланган. Натижада ҳар бир фуқаро улушига ўртача 0,7 квадрат метр майдон тўғри келмоқда — бу мебел столи майдонидан ҳам кичик.
Солиқ органлари амалдаги ижтимоий меъёрларга кўра, бир киши учун минимал яшаш майдони камида 16 квадрат метр этиб белгиланганини эслатиб, уй-жойларни ижарага беришда белгиланган нормаларга риоя этиш, ижарачилар учун муносиб яшаш шароитини яратиш зарурлигини таъкидлади.
