Андижонда қорамоллар орасида касаллик тарқалгани айтилмоқда
Ҳолат юзасидан ветеринария ва чорвачиликни ривожлантириш бошқармаси маълумот берди.
Ижтимоий тармоқларда Андижон вилоятида қорамоллар орасида нодуляр дерматит касаллиги тарқалгани ҳақида хабарлар эълон қилинганди. Ҳолат юзасидан Андижон вилояти ветеринария ва чорвачиликни ривожлантириш бошқармаси расмий муносабат билдирди.
Қайд этилишича, Андижон вилоятида парвариш қилинаётган чорва ҳайвонлар орасида нодуляр дерматит касаллиги аниқланмаган.
“Шунингдек, фермер хўжаликлари ва аҳоли қарамоғидаги барча қорамоллар вилоят ветеринария ва чорвачиликни ривожлантириш бошқармаси ва унинг ҳудудий бўлимларида фаолият олиб бораётган эмлаш гуруҳлари томонидан нодуляр дерматит ва бошқа юқумли касалликларга қарши тўлиқ эмланганини, ушбу касалликка ҳеч қандай хавотирга ўрин йўқлиги ва эмланган чорва ҳайвонларидан қон намуналари олиниб, текширилганида касаллик аломатлари аниқланмаганини маълум қиламиз”, дейилади хабарда.
