Москвада мигрантлар ўртасида оммавий жанжал чиқди
Полиция ҳодиса иштирокчиларини аниқлаш бўйича суриштирув бошлаган, дастлабки маълумотларга кўра, тўқнашувда беш киши қатнашган.
2 ноябрь куни Россия пойтахти Москванинг “Филатов луг” турар жой мажмуасида мигрантлар ўртасида навбатдаги оммавий жанжал юз берди. Бу ҳақда шаҳар Ички ишлар бош бошқармаси матбуот хизмати маълум қилди. Воқеа жойига полиция ходимлари етиб бориб, ҳолатни ўрганиш ҳамда иштирокчиларни аниқлаш бўйича суриштирув ишларини бошлаган.
Гувоҳларнинг сўзларига кўра, жанжал давомида мигрантлар бир-бирига пичоқ ва ҳатто болта улоқтирган. Ҳодисани телефонига ёзиб олаётган эркаклардан бирининг бўйнига пичоқ тиралган ва ундан видеога олишни тўхтатиш талаб қилинган, бироқ у воқеа жойидан соғ-омон чиқиб кетган.
Полиция маълумотига кўра, ҳодиса иштирокчилари ички ишлар бўлимига олиб борилган ва уларнинг ҳаракатларига қонуний баҳо берилади. Дастлабки маълумотларга кўра, тўқнашувда тахминан беш киши иштирок этган, аммо ҳозирча жабрланганлар ҳақида хабар берилмаган.
Эслатиб ўтамиз, 25 октябрь куни Москванинг "Прокшино" турар жой мажмуасида ҳам шунга ўхшаш оммавий муштлашув бўлиб ўтган эди. Ўшанда полиция 80 дан ортиқ кишини ушлаб, 65 нафарига нисбатан маъмурий баённома тузган эди.
