Мудофаа вазирлигининг саll-маркази ишга туширилди
Саll-марказ ҳарбий хизмат, сафарбарлик, таъминот ва тиббий хизмат бўйича ахборот беради.
Ўзбекистонда Мудофаа вазирлиги ҳузурида фуқаролар ва ташкилотлардан келиб тушадиган мурожаатларни тезкор қабул қилиш учун мўлжалланган саll-марказ ишга туширилди. Эндиликда мурожаатларни 1530 қисқа рақами орқали сутканинг белгиланган вақтларида узлуксиз қабул қилиш имконияти яратилди.
Мазкур хизмат “Жисмоний ва юридик шахсларнинг мурожаатлари тўғрисида”ги Қонун талаблари асосида ташкил этилган бўлиб, унинг мақсади — аҳолига қулай коммуникация каналларини яратиш ҳамда Мудофаа вазирлиги ваколатига кирувчи масалалар юзасидан аниқ ва тезкор маълумот беришдир, дея маълум қилди вазирлик матбуот хизмати.
Саll-марказ қуйидаги йўналишларда ахборот ва маслаҳат хизматларини кўрсатади:
– муддатли ҳарбий хизматни ўташ тартиби;
– сафарбарлик тайёргарлиги ва ҳарбий ҳисоб масалалари;
– ҳарбий хизматчиларни ижтимоий қўллаб-қувватлаш ва таъминот;
– тиббий хизмат кўрсатиш жараёнлари;
– мудофаа тизими ходимларини тайинлашга оид саволлар.
Мурожаатларнинг барчаси белгиланган тартиб асосида кўриб чиқилади. Фуқароларнинг шахсий маълумотлари ва мурожаатлари мазмуни махфийлиги тўлиқ таъминланиши кафолатланади.
