Россияда оғир шароитда қолган 35 нафар вояга етмаган ёшлар Ўзбекистонга қайтарилди
Элчихона, ИИВ, ССВ ва Миллий ижтимоий ҳимоя агентлиги ҳамкорлигида навбатдаги инсонпарварлик миссияси амалга оширилди.
Россия Федерацияси ҳудудида ота-она қаровисиз, назоратсиз ёки оғир ижтимоий шароитда қолган 35 нафар вояга етмаган Ўзбекистон фуқароси мамлакатга қайтарилди. Қайтариш жараёни Ўзбекистон Республикасининг Москва шаҳридаги Элчихонаси, Ички ишлар вазирлиги, Соғлиқни сақлаш вазирлиги ҳамда Миллий ижтимоий ҳимоя агентлиги ҳамкорлигида шакллантирилган ишчи гуруҳ томонидан амалга оширилди.
Дастлаб, ишчи гуруҳ томонидан Санкт-Петербург, Челябинск ва Москва шаҳарлари бўйича 16 нафар, шунингдек, Екатеринбург, Волгоград, Уфа, Нижний Новгород, Ҳакасиё, Москва вилояти, ҳамда Новосибирск шаҳарларидан 19 нафар бола аниқланиб, уларнинг Ўзбекистонга қайтарилиши таъминланди.
Қайтариш жараёнида болаларнинг шахсини аниқлаш, зарур ҳужжатларни расмийлаштириш, тиббий кўрикдан ўтказиш ҳамда сафарни ташкил этиш каби ташкилий масалалар Россия Федерациясининг тегишли идоралари билан ҳамкорликда бажарилди.
Ушбу чора-тадбирлар Ўзбекистон фуқаролари, хусусан вояга етмаганларнинг ҳуқуқ ва манфаатларини ҳимоя қилиш, уларнинг ижтимоий ҳимоясини кучайтириш ва муносиб шароит яратишга қаратилган изчил ишларнинг давомидир.
