2026 йилдан рецепт асосидаги дорилар 40–50 фоиз арзонлашади

 

Мамлакатда фармацевтика соҳасини тартибга солиш ва дориларнинг иқтисодий жозибадор нархларда сотилишини таъминлаш бўйича янги чора-тадбирлар тасдиқланди. Президентга тақдим этилган лойиҳага кўра, 2026 йил 1 январдан бошлаб рецепт бўйича тавсия этиладиган 2600 турдаги дори воситаларининг ўртача нархи 40–50 фоизга пасайтирилади.

 

Ҳозирда Ўзбекистон бозорида 7600 номдаги импорт дори воситалари мавжуд. Улардан 4900 таси нархлар бўйича “референт мамлакатлар” реестрига киритилмагани сабабли, импортчилар томонидан нарх шакллантириш жараёнида ошкоралик етарли эмас. Натижада дорилар баъзи ҳолларда қўшни давлатлар бозоридаги нархдан анча қимматга сотилмоқда.

 

Референт нархлар реестри — дори воситаларининг Россия, Қозоғистон, Европа Иттифоқи каби давлатларда тасдиқланган расмий нархларини ўзида акс эттирувчи очиқ ахборот базасидир. Дори воситаси мазкур реестрга киритилгач, унинг Ўзбекистондаги нархи халқаро нархлар билан солиштирилиб, давлат томонидан тартибга солинади.

 

Янги тартибга кўра, имкон қадар кўпроқ импорт дорилар ушбу реестрларга киритилади, нархларнинг ошкоралиги таъминланади ҳамда асоссиз нарх ошириш ҳолатларига чек қўйилади. Дорихоналар ва импорт қилувчилар учун эркин нарх белгилаш амалиётига барҳам берилади.

 

Ислоҳотдан дори нархларининг шаффоф ва барқарор бўлиши, аҳолининг дори воситаларига кириш имкониятининг яхшиланиши, сунъий нарх ошириш ва чайқовчилик ҳолатларининг олдини олиниш каби натижалар кутилмоқда.

 

Шу билан бирга, экспертлар мазкур тизимнинг самарадорлиги тартибга солувчи органларнинг назоратига, имтиёзли истиснолар қўлланилмаслигига ҳамда импортчилар томонидан таъминотда узилишлар юзага келмаслигига боғлиқ бўлишини таъкидламоқда.