Андижонда божхона ходимининг ҳужжатини сохталаштирган шахслар ушланди
Улар сохталаштирилган ҳужжат ва маълумотномалар орқали банкдан кредит олишга уринган.
Андижонда банкдан кредит олиш мақсадида божхона ходимига оид сохталаштирилган ҳужжат ва маълумотнома тайёрлаган шахслар қўлга олинди. Бу ҳақда Давлат божхона қўмитаси хабар берди.
Маълум бўлишича, божхона қўмитаси ҳамда Андижон вилояти ва Тошкент шаҳар божхона бошқармалари тезкор тузилмалари томонидан ўтказилган тадбирда, бир гуруҳ шахслар томонидан сохталаштирилган ҳужжатлар тайёрлаш ҳолатига чек қўйилган. Текширув давомида яшаш хонадонида “Ўзбекистон Республикаси Давлат божхона қўмитаси Кадрлар бошқармаси” ёзуви туширилган муҳр, иш ҳақи тўғрисидаги маълумотномалар, шунингдек, сохта божхона ходими гувоҳномаси ва бошқа ҳужжатлар топилган.
Аниқланишича, уч кишидан иборат гуруҳ сохта ҳужжатлар ёрдамида ҳудудлардаги банкларга кредит олиш учун мурожаат қилган. Улар муҳр босилган маълумотнома ва хизмат гувоҳномалари орқали ўз ҳаракатларини яширишга ҳаракат қилган.
Ҳозирда мазкур ҳолат юзасидан терговга қадар текширув ҳаракатлари олиб борилмоқда. Эслатиб ўтамиз, аввалроқ Тошкент шаҳрида ўзини Президент Администрацияси ёки ДХХ ходими сифатида таништириб, ҳужжатларни сохталаштирган шахс қўлга олинган эди.
