“Келажак мероси” халқаро мукофоти таъсис этилади
Мукофот ҳар йили адабиёт, маданий мерос, санъат, илм-фан ва рақамли технологиялар йўналишларида топширилади.
2025 йил 3 ноябрь куни Президентнинг ПҚ–330-сон қарори билан “Келажак мероси” халқаро мукофотини таъсис этиш тўғрисидаги қарор имзоланди. Қарорга мувофиқ, ушбу мукофот санъат, маданият ва илм-фан соҳаларида юксак ютуқларга эришган шахс ва жамоаларни рағбатлантириш мақсадида жорий этилади.
“Келажак мероси” халқаро мукофоти учун танловлар 2025 йилдан бошлаб ҳар йили ўтказилади. У қуйидаги йўналишларни ўз ичига олади: адабиёт, маданий мерос, театр ва кино, мусиқа ва рақс, тасвирий ва амалий санъат, мода ва дизайн, шунингдек, илм-фан, таълим ҳамда рақамли технологиялар.
Мукофотнинг ҳар бир йўналишида ғолибларга статуэтка, диплом ва 10 минг АҚШ доллари миқдоридаги бир марталик пул мукофоти топширилади. Ғолибларни тақдирлаш маросими тантанали тарзда ўтказилиши режалаштирилган.
