Вашингтондаги С5+1 саммитида қайси мавзулар кўтарилади?

Вашингтонда Марказий Осиё беш давлати ва АҚШ иштирокида бўлиб ўтадиган С5+1 саммитида стратегик ҳамкорликнинг асосий йўналишлари муҳокама қилинади, деб хабар бермоқда Ўзбекистон Миллий ахборот агентлиги.

 

Саммитнинг асосий мавзулари минерал ресурслар бўйича ҳамкорликни кенгайтириш ва энергия хавфсизлигини таъминлашга қаратилган. Марказий Осиё АҚШ миллий хавфсизлиги ва «яшил» энергетик ўтиш жараёни учун зарур бўлган стратегик материалларга бой минтақа ҳисобланади. Ўзбекистонда вольфрам, литий, германий каби 14 турдаги ноёб унсурлар конлари аниқланган, Қозоғистон дунё уранининг 39 фоизини етказиб беради, Тожикистон эса дунё сурма ишлаб чиқаришида иккинчи ўринни эгаллайди.

 

Шунингдек, саммитда иқтисодий шерикликни чуқурлаштиришга қаратилган икки ва кўп томонлама битимлар имзоланиши, транспорт инфратузилмасини ривожлантириш ва Транскаспий халқаро транспорт йўлагини яратиш масалалари ҳам муҳокама қилинади. Терроризмга қарши кураш ва чегара хавфсизлиги мавзулари, шунингдек, Афғонистондаги вазият ҳам кун тартибида бўлиши кутилмоқда.

 

Мутахассислар фикрича, С5+1 саммити Марказий Осиёнинг АҚШ учун стратегик аҳамиятини оширишга хизмат қилади. Озарбайжонни жалб этган ҳолда платформани кенгайтириш масаласи минтақавий боғланиш тизимида муҳим аҳамият касб этади.