Комил Алламжонов АҚШга ўзбекистонликлар учун 10 йиллик виза жорий этишни таклиф қилди
У буни 2026 йилдан АҚШ фуқаролари учун Ўзбекистонда визасиз тартиб жорий этилиши фонида билдирди.
Президент Администрацияси раҳбари ёрдамчиси Саида Мирзиёеванинг маслаҳатчиси Комил Алламжонов ўзбекистонлик фуқаролар учун АҚШ томонидан 10 йиллик визалар жорий этилишини таклиф этди. Бу ҳақда Алламжонов 3 ноябрь куни X (собиқ Twitter) платформасидаги саҳифасида маълум қилди.
У ўз постида Ўзбекистон Республикаси Президентининг фармонига мувофиқ, 2026 йил 1 январдан бошлаб АҚШ фуқаролари учун 30 кунгача визасиз кириш тартиби жорий этилишини эслатди. Мазкур янгиликка изоҳ билдирган АҚШ Давлат котиби биринчи ўринбосари Кристофер Ландау визасиз режимни “америкалик сайёҳлар учун кенг имкониятлар очувчи муҳим қадам” сифатида баҳолади.
Алламжоновнинг қайд этишича, у яқинда Кристофер Ландау ҳамда АҚШ Президентининг Жанубий ва Марказий Осиё масалалари бўйича махсус вакили Сержио Гор билан учрашувда америкалик туристлар учун виза бекор қилиниши масаласини муҳокама қилган. Шу муносабат билан у B1/B2 тоифасидаги визалар амал қилиш муддати ўзбекистонликлар учун 1 йилдан 10 йилгача узайтирилиши икки давлат ўртасидаги алоқаларни янада мустаҳкамлаши мумкинлигини таъкидлади.
“Аллақачон муҳим қадам ташланди — Ўзбекистон АҚШ фуқаролари учун очиқ. Энди ўзбекистонликларга ҳам Америка визаси муддатини узайтириш имконияти берилса, бу икки томонлама ҳамкорликни янада мустаҳкамлайди”, — дея таъкидлади Алламжонов.
У, шунингдек, Марказий Осиё давлатлари ва АҚШ ўртасида ҳамкорлик салоҳияти юқори эканини қайд этди: “Минтақа ва АҚШ бир-бирига таклиф қиладиган ва бир-биридан оладиган фойдали имкониятлар кўп. Муҳими — бошладик, бу жараённинг йўлга қўйилгани мени қувонтирaди”, — деди Алламжонов.
