Ўзбекистонда кибержиноятлар энг кўп қайд этилган банклар рўйхати эълон қилиб борилади — ИИВ

 

Ҳар йил якунида кибержиноятлар энг кўп содир этилган банклар ва тўлов ташкилотлари рўйхати оммавий равишда эълон қилинади. Бу ҳақда 3 ноябрь куни бўлиб ўтган матбуот анжуманида Ички ишлар вазирлиги Тезкор-қидирув департаменти Киберхавфсизлик маркази масъул ходими, капитан Мақсуджон Мирабдуллаев маълум қилди.

 

Қайд этилишича, Ўзбекистон Президентининг 2025 йил 30 апрелдаги 153-сонли қарорига мувофиқ, Ички ишлар вазирлиги мамлакатда кибержиноятларга қарши курашиш бўйича ваколатли орган этиб белгиланган. Мазкур қарор билан банклар ва тўлов ташкилотларига кибержиноятларнинг олдини олиш, ахборот хавфсизлиги сиёсатига риоя этиш борасида қатъий жавобгарлик юклатилган.

 

ИИВ вакили таъкидлашича, илгари айрим банк ёки тўлов тизимларида катта миқдордаги маблағ ўғирланиши ёки ноқонуний ечиб олиш ҳолатлари кузатилганида бу маълумотлар оммага тақдим этилмас эди. Эндиликда эса йил якунида қайси банк самарали фаолият кўрсатгани, қайси бири эса заифликларига кўра кибержиноятларга имкон яратгани бўйича очиқ статистик маълумотлар эълон қилинади.

 

Шунингдек, банк ёки тўлов ташкилоти айби билан фуқароларнинг маблағлари ўзлаштирилган ҳолатлар юзасидан батафсил маълумотлар бериб борилади. Ушбу маълумотларда жиноят қандай усулда амалга оширилгани ва етказилган зарар миқдори очиқ ёритилади.

 

Мазкур амалиёт банклар ва тўлов тизимларининг киберхавфсизлик талабларига риоя этиш бўйича масъулиятини ошириши, тизимдаги заифликларни бартараф этишга ундаши ҳамда кибержиноятларнинг олдини олишда самарадорликни таъминлаши кутилмоқда.