Зангиотада эгаси номаълум 5 килограмм наркотик модда топилди

Гиёҳвандлик воситаларининг ноқонуний савдоси ва истеъмоли жамият саломатлигига, ёшлар тақдирига ҳамда мамлакат тараққиётига жиддий таҳдид солишда давом этмоқда. Ушбу хавфли иллатга қарши кескин чоралар кўриш давлат сиёсатининг устувор йўналишларидан биридир.

 

Давлат хавфсизлик хизмати томонидан Ички ишлар ва Божхона органлари билан ҳамкорликда ўтказилган тезкор тадбирлар натижасида йирик ҳажмдаги гиёҳвандлик воситаларининг ноқонуний айланиши фош этилди.

 

Хусусан, Тошкент вилояти Зангиота тумани ҳудудидан ўтувчи Тошкент катта ҳалқа автомобиль йўли яқинидаги яширилган жойдан гиёҳванд модда топилди. Текширув жараёнида илгари наркокурерлар томонидан қолдирилган 10 дона ўрамда, жами 4 килограмм 956 грамм “опий” моддасининг борлиги аниқланиб, ҳолислар иштирокида процессуал тартибда расмийлаштирилди.

 

Мазкур ҳолат юзасидан Ўзбекистон Республикаси Жиноят кодексининг 273-моддаси 5-қисми билан жиноят иши қўзғатилди. Ҳозирда гиёҳванд моддаларни яширган шахсларни аниқлаш бўйича зарур тергов ва тезкор чора-тадбирлар олиб борилмоқда.