Божхона назоратида янги тартиблар жорий этилди

Вазирлар Маҳкамасининг 2025 йил 6 ноябрдаги қарори билан божхона назорати шакллари ягона ҳужжатга бирлаштирилди. Энди ҳужжатлар ва маълумотларни текшириш, божхона кўздан кечируви, шахсий кўрик ва транспорт воситаларини инвентаризациядан ўтказиш каби жараёнлар аниқ тартибга солинди. Шу билан бирга, декларантлар томонидан товарларни кўздан кечириш имконияти ҳам расмийлаштирилди.

 

Янги қарор билан илгари норматив-ҳуқуқий ҳужжатларда мавжуд бўлмаган тартиботлар ҳам белгиланди. Масалан, техник ходимлар, хизмат итлари ва техник воситалардан фойдаланиш, товарларни қайта юклаш жараёнида назорат ўрнатиш, шунингдек, чекка божхона постларида кучайтирилган назорат тизими энди расмийлаштирилган. Божхона аудити ва ваколатли идораларни хабардор қилиш тартиби ҳам аниқ кўрсатиб ўтилган.

 

Халқаро почта ва курьерлик жўнатмаларини расмийлаштириш тартибида ҳам янгиликлар киритилди. Энди хавфларни бошқариш тизими орқали почта жўнатмаларини назорат қилиш, электрон тижоратдаги товарларни экспортга расмийлаштириш ва жўнатмалар декларацияси тушунчалари тартибга солинди. Бу ўзгаришлар халқаро савдо ва онлайн савдони соддалаштиришга хизмат қилади.

 

Шунингдек, божхона постларида транспорт назорати ахборот тизимлари орқали амалга оширилади, вақтинча олиб кирилаётган товарлар учун божхона имтиёзлари муддати ва шартлари белгиланди. Электрон декларациялаш тартиботлари такомиллаштирилди ва сариқ йўлакда экспертиза ўтказиш ҳуқуқи берилди. Чегара божхона постларида икки йўлакли тизимни қўллаш тартиби ҳам амалиётга жорий этилди.