Ўзбекистон ва Озарбайжон жиноятларга оид мобил қурилмалар бўйича маълумот алмашади
Икки давлат ўғирланган ва клонланган телефонлар бўйича ягона ахборот тизимини жорий этади.
Ўзбекистон ва Озарбайжон ҳукуматлари ўртасида клонланган, ўғирланган, йўқолган ёки жиноят фаолияти билан боғлиқ мобил қурилмалар ҳақида ахборот алмашиш бўйича битим тасдиқланди. Бу ҳақда Адлия вазирлиги маълум қилди. Шунга мувофиқ, икки давлат ҳуқуқ-ният органлари энди жиноятда ишлатилган ёки ноқонуний равишда қўлга киритилган мобил қурилмаларни аниқлашда ўзаро маълумот олиш имконига эга бўлади.
Битимни амалга ошириш учун масъул орган этиб Рақамли технологиялар вазирлиги белгиланди. Мазкур тизим ишга туширилгач, давлатлар ўртасида IMEI-кодлар, қурилма эгаси тўғрисидаги маълумотлар ва жиноят сабаблари бўйича тезкор маълумот алмашинуви йўлга қўйилади. Бу эса ноқонуний сотувлар, “қора бозор” ва жиноят тармоқларини аниқлашда муҳим восита бўлиши кутилмоқда.
Шунингдек, битим кучга киргач, Вазирлар Маҳкамаси ҳамда тегишли идоралар унинг ижроси устидан мониторинг ва назоратни таъминлайди. Мазкур ҳамкорлик жиноятчиликка қарши курашда, айниқса, трансчегаравий мобил алоқа воситалари билан боғлиқ жиноятларни камайтиришда муҳим аҳамиятга эга.
Аввалроқ, 19 май куни Ўзбекистон ва Озарбайжон ўртасида иттифоқчилик муносабатлари тўғрисидаги шартнома ратификация қилинган эди. Ушбу ҳужжат икки давлат ўртасидаги сиёсий, иқтисодий ва хавфсизлик соҳасидаги стратегик ҳамкорликни чуқурлаштириш, ўзаро қўллаб-қувватлаш ва мустақиллик ҳамда ҳудудий яхлитликни ҳурмат қилиш тамойилларига асосланади.
