Хоразмда профилактика инспектори пора билан қўлга тушди
Ҳозирда унга нисбатан иккита модда бўйича жиноий иш очилган.
Хоразм вилоятида ўтказилган тезкор тадбир давомида профилактика инспектори пора олаётган пайтда қўлга олинди. Бу ҳақда Ички ишлар вазирлиги ахборот хизмати хабар берди.
Маълум қилинишича, фуқаро таниши билан ўзаро келиб чиққан низоли масала юзасидан мурожаат қилган. Унга кўра, ҳамкорликда очилган хусусий корхонага алоқадор ҳужжатлардаги имзолар шериги томонидан сохталаштирилган, даромадлар эса ўзлаштириб келинаётгани билдирилиб, масала ҳуқуқий тартибда кўриб чиқилиши сўралган.
Шу жараёнда мазкур ҳудуд учун масъул профилактика инспектори танишлари орқали экспертиза натижаларини фуқаро фойдасига чиқариб беришни ваъда қилган. Бунинг эвазига у 1 000 АҚШ доллари миқдорида пора талаб қилган. Тезкор тадбир давомида инспектор Хива шаҳрида пулни олаётган вақтида далилий ашёлар билан қўлга олинган.
Ҳолат юзасидан Хоразм вилояти прокуратураси томонидан ҳолат юзасидан Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш) орқали 168-моддаси (фирибгарлик) 3-қисми «в» банди ва 28-моддаси (жиноят иштирокчиларининг турлари) орқали 211-моддаси (пора бериш) 1-қисми билан жиноят иши қўзғатилган ҳамда ходимга нисбатан «қамоқ» эҳтиёт чораси қўлланилган.
