Қашқадарёда қуёш панели ўрнатганларга 11 млрд сўмдан ортиқ субсидия тўланди
Ҳудудда энергия тежамкор технологияларни қўллаш кенгаймоқда.
Қашқадарё вилоятида хонадон ва объектларга қуёш панеллари ўрнатишни рағбатлантириш давом этмоқда. Маълум қилинишича, жорий йилнинг январь-сентябрь ойларида вилоят аҳолиси ва тадбиркорларга 11 миллиард 800 миллион сўмдан зиёд субсидия ажратилган. Ушбу маблағ қуёш панеллари орқали ишлаб чиқарилган ва электр тармоқларига узатилган энергия учун тўлаб берилган.
Умуман олганда, шу даврда Ўзбекистон бўйича 35 мингдан ортиқ жисмоний шахс 153,6 миллиард сўм ҳажмда субсидия олган. Энг катта улуш Хоразм вилояти (42,6 млрд сўм), Қорақалпоғистон Республикаси (22,4 млрд сўм) ва Бухоро вилоятига (15,3 млрд сўм) тўғри келган.
Эслатиб ўтамиз, 2023 йил 1 апрелдан бошлаб уйига қуёш панели ўрнатган фуқаролар ишлаб чиқарган ва ягона электр тармоғига узатган ҳар бир киловатт-соат энергия учун 1000 сўмдан субсидия олиш ҳуқуқига эга. Бу тартиб энергия тежамкор ечимларни оммалаштиришга хизмат қилмоқда.
Мутахассислар фикрича, субсидия дастури уй хўжаликларининг харажатларини камайтириш, қайта тикланувчи энергия улушини ошириш ва энергия таъминотида барқарорликни таъминлашга сезиларли таъсир кўрсатмоқда. Аҳолининг ушбу технологияларга қизиқиши ҳам йилдан-йилга ортмоқда.
