Туркия Нетаняхуни ҳибсга олиш бўйича ордер чиқарди
Айблов Ғазога инсонпарварлик ёрдами олиб кетаётган “Озодлик флотилияси” кемаларига қилинган ҳужум бўйича очилган жиноят иши доирасида қўлланди.
Туркия ҳукумати Исроил Бош вазири Бинямин Нетаняху ва яна 36 нафар шахсга нисбатан ҳибсга олиш ордерини расмий равишда чиқарди. Ушбу қарор Истанбул Бош прокуратураси томонидан қабул қилинган.
“Ҳабер Глобал” хабарига кўра, гумонланувчиларга нисбатан “геноцид” моддаси бўйича айблов илгари сурилган. Мазкур қарор Ғазо секторига гуманитар ёрдам олиб кетаётган “Озодлик флотилияси” кемаларига уюштирилган ҳужум билан боғлиқ жиноят иши доирасида қабул қилинган.
Маълумот учун, жорий йилнинг октябрь ойи бошида Исроил ҳарбий-денгиз кучлари Ғазо қирғоқлари яқинида фаластинликлар учун инсонпарварлик юки ортилган тўққизта кемани тўхтатиб, қўлга олган эди. Исроил Ташқи ишлар вазирлиги буни кемалар жанговар ҳудудга кириб боргани ва Ғазо секторидаги денгиз блокадаси қоидаларини бузгани билан изоҳлаган.
