Наманган аэропортида “iPhone”чилар ушланди

 

Наманган вилояти божхона бошқармасининг “Наманган аэропорти” чегара божхона пости ходимлари томонидан уяли алоқа воситаларини республикага яширинча олиб кириш билан боғлиқ бир нечта уринишлар фош этилди. Бу ҳақда Божхона қўмитаси хабар берди.

 

Дастлаб, Қувайтдан учиб келган бир гуруҳ йўловчилар ўзларига тегишли бўлмаган, умумий қиймати 160 миллион сўмлик 8 дона “iPhone 17” русумли мобил телефонларни бошқа шахс илтимосига кўра божхона назоратидан яширинча олиб киришга урингани аниқланиб, улар тўхтатиб қолинди.

 

Кейинги ҳолатда, Жиддадан Умра зиёратидан қайтаётган йўловчилардан бири божхона назоратидан ўтмаслигига ишониб, 5 дона “iPhone 17” телефонини ноқонуний олиб киришга уринган вақтида фош этилди.

 

Яна бир уринишда эса бир фуқаро Жидда–Наманган рейси йўловчилари орасида 10 дона “iPhone 17” телефонини тарқатиб, уларни “шахсий фойдаланиш” сифатида расмийлаштириб, божхонадан яширинча олиб ўтмоқчи бўлган. Аммо, аэропорт автотураргоҳида телефонларни йўловчилардан қайта йиғиб олаётган вақтида ушбу ҳаракат фош қилинди.

 

Ҳозирда мазкур ҳолатлар юзасидан божхона органлари томонидан суриштирув ишлари олиб борилмоқда.