Тошкент ва унинг атрофида ҳавонинг ифлосланиши сабаб экологик рейдлар бошланди
Иссиқхоналар кескин назоратга олинди.
Тошкент шаҳри ва унга яқин ҳудудларда ҳавонинг сифати ёмонлашгани сабабли экологик назорат кучайтирилди. Ҳавони ифлослантириши мумкин бўлган манбаларни аниқлаш, санитария ва экологик талабларга риоя этилишини текшириш мақсадида кенг кўламли рейдлар йўлга қўйилди. Бу ҳақда шаҳар ҳокимлиги матбуот хизмати маълум қилди.
Текширувлар Бош прокурор ўринбосари бошчилигида экология, санитария-эпидемиология хизмати, ҳокимлик, Фавқулодда вазиятлар вазирлиги мутахассислари иштирокида олиб борилмоқда. Зангиота туманида ўтказилган рейдларда иссиқхоналар фаолияти атрофлича кўздан кечирилиб, аниқланган қоидабузарликларга нисбатан чоралар кўрилмоқда.
Рейдларнинг асосий вазифаси ҳавога зарар етказувчи омилларни бартараф этиш, экологик вазиятнинг янада оғирлашишига йўл қўймаслик ҳамда аҳолига соғлом атмосферани таъминлашдан иборат.
Сўнгги кунларда пойтахт аҳолиси орасида қалин туман, аччиқ ёниш ҳиди ва ҳавонинг оғирлиги юзасидан шикоятлар кўпайган. Фуқаролар айниқса кечки ва эрталабки пайтларда ҳаводаги нохуш ҳид кундалик ҳаётга сезиларли ноқулайлик туғдираётганини таъкидлашмоқда.
