"Ўзбекистон АҚШнинг кичик ядровий реактор технологияларини ўрганади" — "Ўзатом" раҳбари

Ўзбекистон Американинг кичик модулли ядровий реактор (SMR) технологияларини ўрганишга қизиқиш билдирмоқда. Бу ҳақда «Ўзатом» агентлиги директори Азим Ахмедхажaев Gazeta’га берган интервьюсида маълум қилди. Унинг айтишича, сентябрь ойида Нью-Йоркда Ўзбекистон ва АҚШ ўртасида атом энергиясидан тинч мақсадларда фойдаланиш бўйича англашув меморандуми имзоланган.

 

Азим Ахмедхажaевнинг таъкидлашича, Президент Шавкат Мирзиёевнинг АҚШга ташрифи чоғ‘ида ҳамкорлик янада кенгайтирилган ва Ўзбекистон Holtec, GE Hitachi ҳамда NuScale каби Америка компанияларининг сертификатланган SMR лойиҳаларини ўрганишга тайёрлигини тасдиқлаган. Бу йўналиш Ўзбекистоннинг энергетика хавфсизлигини мустаҳкамлаш ва келажакдаги талабни қоплашга қаратилган.

 

«Ўзатом» раҳбари мамлакат энергетика соҳасида кўп векторли сиёсатни давом эттираётганини қайд этди. Ҳозирда Россия билан RITМ-200N реакторларига асосланган кичик АЭС қурилиши, Хитой билан SMR ва уранни қайта ишлаш бўйича ҳамкорлик давом этмоқда. Америка технологияларини ўрганиш эса мавжуд йўналишларни диверсификация қилишнинг мантиқий босқичи сифатида баҳоланди.

 

АҚШ билан тузилган келишув доирасида кадрлар тайёрлаш ва қўшма илмий-амалий дастурларни йўлга қўйиш режалаштирилган. SMRларнинг референт намуналарини таҳлил қилиш орқали Ўзбекистон 2050 йилгача кутилатаётган электр энергияси истеъмоли ўсишига мос равишда барқарор энергия таъминотини шакллантиришни мақсад қилмоқда