Ўзбекистоннинг олтин-валюта захиралари рекорд даражада ошди
Бир ойда 4,3 млрд долларлик ўсиш қайд этилди, олтин ҳажми ва қиймати ҳам ошди.
2025 йил 1 ноябрь ҳолатига кўра, Ўзбекистоннинг расмий халқаро захира активлари 59,3 млрд долларга етди. Бу кўрсаткич мамлакат тарихида қайд этилган энг юқори натижа ҳисобланади. Мазкур маълумот Марказий банкнинг “Ўзбекистон Республикасининг халқаро захиралари тўғрисидаги ҳисоботи”да келтирилди.
Жорий йилда захираларнинг сезиларли ошиши, асосан, халқаро бозорда олтин нархларининг йил бошидан буён қарийб 50 фоизга ошгани билан изоҳланади. Натижада Ўзбекистоннинг олтин-валюта захиралари бир ой давомида 4,3 млрд долларга, йил бошидан буён эса тахминан 18,2 млрд долларга кўпайди.
Захиралар таркибидаги ўсиш динамикаси:
- Валюта активлари октабр ойида 731 млн долларга ошган.
- Олтин захиралари қиймати эса 3,6 млрд долларга кўтарилиб, 47,8 млрд долларга етган.
- Олтиннинг жисмоний ҳажми ҳам ортган — 11,6 млн троя унциядан 11,9 млн троя унцияга кўпайган.
Шунингдек, Марказий банк балансидаги қимматли қоғозлар портфели қиймати ҳам ўтган ой давомида бироз ошиб, 1 млрд 23 млн долларга етди.
Олтин нархларининг кескин кўтарилиши глобал геосиёсий вазият, халқаро молия бозорларидаги беқарорлик ва АҚШ Федерал Резерв тизими сиёсатидаги ўзгаришлар билан боғлиқ бўлгани таъкидланмоқда.
