Ўзбекистонда шартли равишда озод этилган фуқароларга назорат кучайтирилади
Эндиликда улар пробация органларига мунтазам ҳисобот беради.
Ўзбекистон Олий Мажлисининг навбатдаги мажлисида шартли равишда муддатидан олдин озод этилган шахслар устидан назоратни кучайтиришга қаратилган қонун лойиҳаси биринчи ўқишда маъқулланди.
Қонун лойиҳасига кўра, пробация назоратида бўлган фуқаролар эндиликда белгиланган тартибда назорат органларига мунтазам равишда ҳисобот бериб боришлари шарт бўлади. Агар улар белгиланган талабларга амал қилмаса ёки қоидабузарликка йўл қўйса, суд қарори билан жазони ўташга қайта йўналтирилиши мумкин бўлади.
Мазкур ташаббус Жиноят-ижроия кодексига янги 28¹-бобни киритишни назарда тутади. Унда пробацион назоратнинг ҳуқуқий асослари, қўшимча мажбуриятлар, уларни бекор қилиш тартиби ҳамда назорат талабларини бузиш оқибатлари белгилаб қўйилган.
Депутатлар таъкидлашича, қонун лойиҳасининг қабул қилиниши пробация тизимини мустаҳкамлаш, қонунга ҳурматни кучайтириш, жамоат хавфсизлигини таъминлаш ва такрорий жиноятларнинг олдини олишга хизмат қилади.
