Ўзбекистонда юриш масофаси ўзгартирилган автомобилларни сотганлик учун жарима белгиланиши мумкин
Қонун лойиҳаси 2025 йил 20 ноябргача жамоатчилик муҳокамасида бўлади.
Ўзбекистонда одометри (юриш масофаси ўлчагичи) ўзгартирилган автомобилларни харидорни огоҳлантирмасдан сотганлик учун маъмурий жавобгарлик белгиланиши кутилмоқда.
Олий Мажлис Қонунчилик палатаси ишлаб чиққан тегишли қонун лойиҳаси жамоатчилик муҳокамаси учун эълон қилинди.
Ҳужжатда сўнгги йилларда ишлатилган автомобиллар бозорида одометр кўрсаткичларини сунъий равишда камайтириш, яъни автомобилнинг ҳақиқий юрган масофасини яшириш орқали уни юқорироқ нархда сотиш ҳолатлари ортиб бораётгани таъкидланган.
Лойиҳага кўра, Маъмурий жавобгарлик тўғрисидаги кодекс “Транспорт воситасининг одометр кўрсаткичлари ўзгартирилганлиги ёки одометр алмаштирилганлиги тўғрисида хабар бермаслик” номли янги 121-1-модда билан тўлдирилади.
Унга мувофиқ, агар сотувчи харидорни қурилма алмаштирилган ёки унинг кўрсаткичлари ўзгартирилганлиги ҳақида огоҳлантирмаса, у 10 дан 15 гача асосий ҳисоб бирлиги миқдорида — 4,12 миллион сўмдан 6,18 миллион сўмгача жаримага тортилиши мумкин.
Ташаббус муаллифлари бу норма истеъмолчиларнинг ҳуқуқларини ҳимоя қилишга, иккиламчи автомобиль бозорида фирибгарлик ва ишончни суиистеъмол қилиш ҳолатларининг олдини олишга хизмат қилишини қайд этишган.
Қонун лойиҳаси 2025 йил 20 ноябргача жамоатчилик муҳокамаси учун очиқ.
