Ўзбекистонда талабалар сони беш йилда 2,2 баробар ошди
Тошкент шаҳри ва Бухоро вилояти талабаларнинг энг катта қисмини ташкил этмоқда, энг кам кўрсаткич эса Сирдарё вилоятида қайд этилди.
Миллий статистика қўмитасининг маълумотларига кўра, 2024/2025 ўқув йилида мамлакатдаги олий таълим муассасаларига 381,7 минг нафар талаба қабул қилинган. Бу кўрсаткич 2020/2021 ўқув йилидаги натижаларга нисбатан 2,2 баробар кўпдир.
Жорий йили талабаларнинг 196,7 минг нафари қизлар, 185 минг нафари ўғил болалардир. Статистик маълумотларга кўра, олий таълимда таҳсил олаётган қизлар сони ўғил болаларникидан 12 минг нафарга ортиқ.
Ҳудудлар кесимида Тошкент шаҳри 155,2 минг нафар талаба билан етакчилик қилмоқда. Ундан кейинги ўринларда Бухоро (31,5 минг), Тошкент вилояти (27 минг) ва Самарқанд вилояти (21,2 минг) жойлашган.
Энг кам талаба сони эса Андижон (12,5 минг), Навоий (9,2 минг), Жиззах (6,3 минг) ва Сирдарё (5,3 минг) вилоятларида қайд этилган.
Мутаҳассисларнинг фикрича, олий таълим муассасалари сонининг кўпайиши, қабул квоталарининг кенгайиши ҳамда таълимга кириш имкониятларининг оширилиши ёшлар орасида олий таълимга қизиқишни сезиларли равишда кучайтирди.
