Шавкат Мирзиёев: Марказий Осиё янги давр остонасида
Давлат раҳбари “Янги Ўзбекистон” газетасида чоп этилган мақоласида Марказий Осиё давлатлари ўзаро ишонч ва ҳамкорликнинг янги босқичига кирганини таъкидлади.
Президент Шавкат Мирзиёевнинг “Янги Ўзбекистон” газетасининг 2025 йил 13 ноябрь кунги 234-сонида эълон қилинган “Марказий Осиё янги давр остонасида” сарлавҳали мақоласида минтақанинг бугунги тараққиёт йўналишлари ва истиқболлари кенг ёритилган.
Давлат раҳбари таъкидлаганидек, Марказий Осиё ўз тараққиётининг янги, тарихий босқичига қадам қўймоқда. Унга кўра, бу жараён ўз-ўзидан юзага келмаган, балки минтақа мамлакатлари раҳбарларининг сиёсий иродаси, аниқ мақсадга йўналтирилган саъй-ҳаракатлари ва ўзаро ишончга асосланган ҳамкорлик сиёсати натижасидир.
Президент минтақада биринчи бор мустаҳкам ўзаро ишонч, яхши қўшничилик ва ҳурмат муҳити шаклланганини, бу эса мамлакатлар ўртасида янги босқичдаги бирдамлик ва ўзаро тушуниш тамойилларини кучайтираётганини таъкидлади.
Шавкат Мирзиёев Марказий Осиё давлатлари раҳбарларининг Маслаҳат учрашувлари минтақада янги мулоқот архитектурасини яратганини, Тошкентда бўлиб ўтадиган навбатдаги саммит эса барқарор, ўзаро боғлиқ ва фаровон Марказий Осиёни барпо этишда янги босқични бошлаб беришини қайд этди.
Давлат раҳбари мақолада шунингдек, минтақавий ҳамкорликни мустаҳкамлаш сиёсий мақсад эмас, балки стратегик заруратга айланганини, бу жараён Марказий Осиёни барқарорлик, бунёдкорлик ва ўзаро ишонч масканига айлантирганини алоҳида таъкидлади.
