Сирдарёда солиқ инспекцияси раҳбари ходимларини ҳақорат қилгани бўйича текширув бошланди
Солиқ қўмитаси видеодаги ҳолат 2024 йилда содир бўлганини маълум қилди.
Ижтимоий тармоқларда Сирдарё вилоятининг Сирдарё туман давлат солиқ инспекцияси раҳбари ходимларига нисбатан ҳақоратомуз сўзлар ишлатган видеолавҳа кенг тарқалди. Видеода мансабдор шахс ходимларини камситувчи ва одобсиз иборалар билан таҳдид қилгани эшитилади.
«Дарё»нинг ёзишича, ҳолат юзасидан Солиқ қўмитаси ахборот хизмати билан боғланган. Қўмита Сирдарё вилоят солиқ бошқармаси томонидан воқеа назоратга олингани ва текширув бошланганини тасдиқлаган. Дастлабки маълумотларга кўра, мазкур ҳолат 2024 йилда содир бўлган.
Ҳозирда ҳолат юзасидан ўрганиш ишлари давом этмоқда. Солиқ бошқармаси якуний хулоса жамоатчиликка белгиланган тартибда тақдим этилишини билдирди.
